الكتب والمذكرات

طلبة كتير بتشترى كتب الاقسام الخاصة بالكلية كلها وغير انها بتكون غالية فى الفاضى الا انهم فى الاخر مش بيذاكروا منها وبيذاكروا من المذكرات

عشان كدة اهم حاجة اولا اعرف ان شراء الكتب مش اجبارى باستثناء كتب معينة هنقولهم دلوقتى ان شاء الله

ثانيا:فى مذكرات كتير موجودة فى المكتبات اللى قدام الكلية على طول للدكاترة اللى فى الكلية او دكاترة تانيين وانت وراحتك بس اهم حاجة لازم تثبتلك مصدر واحد لمذاكرتك وتكون مقتنع بيه واكيد لازم يكون مصدر كويس وشامل للمنهج بس اهم حاجة انك تكون مقتنع بيه عشان تثبت عليه وترتاح وتطمن من مذاكرتك فيه

هنتكلم الاول عن الكتب اللى فى الكلية

الفسيولوجى:متقسم على كتابين شرح وكتاب عملى وكتاب Cases (هنتكلم عنها بعدين)وكتاب MCQ(اسئلة الاختيارى)

طبعا دى حاجة ترجعلك عاوز تشترى براحتك بس صدقنى مش مسألة انها غالية وبس ..بس انت كمان ممكن تضايق من شكل الكتاب وتنظيمه وفى الاخر مش هتفتحه وتشوف حاجة تانية تذاكر منها

الكتاب الوحيد الاجبارى تشتريه هو كتاب العملى لانه عليه درجات وبيتوقع فيه من الدكاترة اللى عليك فى السكشن.

اما الباقى فأنت وراحتك والمكتبات الموجودة قدام الكلية بتصور الكتب دى وبتكون كويسة جدا لو حبيت تشتريها مفيش مشاكل بس كتاب العملى لازم النسخة تكون اصلية مش مصورة.

وموجود كمان فى المكتبات مذكرات الدكتور "لاشين" ودى كويسة جدا وممكن تستغنى عن الكتاب وتذاكر منها حسب راحتك.

الاناتومى:الكتب كمان مش اجبارى كل فرع ليه كتاب خاص بيه واوقات بيحصل تعديل فى تنظيم الكتاب وبعض المحتويات والمذكرات الموجودة بيحصل فيها نفس التعديلات عشان تكون موافقة للكتب

عاوز تشترى الكتب او تصورها او تشترى مذكرات كله براحتك والمذكرات الموجودة خصوصا فى مادة الاناتومى جميلة جدا ولدكاترة كتير وتنظيمها كويس جدا

الكتاب الاجبارى تشتريه هو كتاب العملى لانه عليه درجات هو كمان

البايو:كتاب واحد للشرح وكتاب عملى وكتاب MCQ

ومفيش حاجة اجبارى تشتريها حتى كتاب العملى بس لو عاوز تبقى فى الامان اشتريه مفيش مشاكل لان اللى عليه درجات حاجة تانية اسمها اللوج بوك Log Book

والمذكرات الموجودة مذكرات الدكتور هشام منصور والدكتور أحمد محسن

الهستولوجى:كتاب شرح وكتاب عملى وكتاب MCQ

ومفيش حاجة اجبارى حتى العملى كمان مش اجبارى بس كتاب عملى الهستولوجى مطلوب انك ترسم فيه عشان كدة اما تشتريه او تشترى اى اسكتش رسم ترسم فيه وهنرفع ان شاء الله على المنتدى اسكتش للرسم مكتوب فيه اسماء الرسومات اللى هترسمها ومنظم بنفس نظام الكتاب والرسم ده لسة بدرى عليه شوية بيكون فى الترم التانى او اخر الترم الاول

وفى مذكرات موجودة للدكتور احمد عثمان والدكتور ابراهيم ناجى كويسين جدا بس المادة دى دكاترة كتير بينصحوا انها تتذاكر من الكتاب مع ان الكتاب كبير وكلامه كتير شوية

بس لو حبيت تشتريه او تصوره حتى يبقى كويس

فى حاجة تانية اسمها كتاب اللوج بوك Log Book وده لازم تشتريه فى كل المواد او تطبعه من على النت باستثناء الاناتومى على حسب ما يطلبوا منك وهنرفعهم على المنتدى قريب ان شاء الله

خلاصة الموضوع :كتب العملى فى الفسيولوجى والاناتومى لازم تشتريها والباقى ليه بدائل تانية وانت وراحتك

اللوج بوك لازم تشتريه

بالنسبة للمصدر اللى هتذاكر منه متقلقش خالص لو ذاكرت من مذكرات او من الكتاب طالما متابع مع الدكاترة والمذكرات اللى هتشتريها لازم تكون المذكرات الجديدة وبلاش تشترى حاجة من اى سنة فاتت الا لو متأكد ان مفيش تعديل ولو فى حرف واحد حصل فى المحتوى ودى مجموعة من افضل المذكرات الموجودة (مذكرات الدكتور ممدوح فى الاناتومى وموجودة فى مكتبة الامير ومذكرات الدكتور لاشين فى الفسيولوجى ومذكرات الدكتور أحمد محسن فى البايو ومذكرات الدكتور احمد عثمان فى الهستولوجى)

وبالتوفيق ان شاء الله

جزاكم اللة خيرا

شكرا عالافادة وجزاك الله كل خير على المجهود الاكثر من رائع